A película Antes de nós, dirixida por Ángeles Huerta, será o filme de apertura da XXII edición do Festival de Cans, que este ano celébrase entre o 20 e o 24 de maio. Antes de nós terá a súa estrea no certame antes da súa chegada ás salas de cine. A estrea estará arroupada pola directora e polos actores protagonistas Xoan Fórneas, Cris Iglesias e Nancho Novo entre otros.
O Festival de Cans presentou hoxe en rolda de prensa no Café de Altamira de Santiago de Compostela a súa sesión de apertura e a súa imaxe gráfica para a edición XXII do certame, deseñada por Pablo Rodríguez, do equipo de Rei Zentolo. Á presentación asistiu por parte do equipo de Antes de nós, a directora Ángeles Huerta, a produtora Zaza Ceballos e a actriz Cris Iglesias; a presidenta da Asociación Arela, Keka Losada, o deseñador de Rei Zentolo, Pablo Rodríguez e o director do festival de Cans, Alfonso Pato.
“Botamos moito de menos á señora Alicia, que por primeira vez non nos acompaña na presentación, pero seguro que a lembraremos no festival de forma especial”, manifestou Alfonso Pato.
Antes de nós, protagonizada por Xoan Fórneas, Cris Iglesias, Nancho Novo e Miquel Insua, e participada por CRTVG é un retrato íntimo e emocional de Castelao. A historia centrarase en dous momentos clave da súa vida: o seu labor como médico durante a pandemia de gripe de 1918 e a viaxe a Bretaña en 1929 coa súa esposa, tras a dolorosa perda do seu fillo Chuchiño.
A directora, Ángeles Huerta, salientou a súa relación emocional con Cans, festival onde se proxectaron por vez primeira as súas curtas, onde obtivo o seu primeiro premio e que sente “como un fogar”. Huerta subliñou a “ilusión” de presentar en Cans Antes de nós, a súa terceira longametraxe despois de Esquece Monelos e O corpo aberto. “Unha figura como Castelao sempre vai suscitar polémica. É unha representación da Galicia que puido ser e non foi. O filme ten unha mirada moi feminina e feminista e é diferente a ollada que se verteu tradicionalmente sobre Castelao”, apuntou a directora.
Pola súa banda, a produtora Zaza Ceballos agradeceu a Cans, “un festival que cada vez ten máis voz e máis suscritores” que estreen a película. A actriz Cris Iglesias apuntou que “está feliz de volver unha vez máis a Cans”, festival polo que pasou como público, xurado e actriz e que a película supón para ela “un antes e despois como actriz e fai xustiza ao contar o relato xusto dunha muller que quedou silenciada, como é Virxinia Pereira”.
A proxección da película terá lugar no serán da xornada do xoves 22 de maio no Círculo Recreativo e Cultural (CRC) do Porriño, e contará coa presenza en Cans da súa directora Ángeles Huerta e dos actores protagonistas Xoan Fórneas, Cris Iglesias e Nancho Novo. A mañá do xoves o equipo do filme fará un encontro co público no Torreiro de Cans, epicentro do festival, e antes da proxección haberá un desfile honorífico en chimpín e unha degustación na Praza do Concello da “tapa Castelao” en honor da película grazas a colaboración de Estrella Galicia.
Presentación da imaxe gráfica vinculada a Castelao
O Festival de Cans tamén presentou hoxe a imaxe gráfica da súa XXII edición. Pablo Rodríguez, deseñador de Rei Zentolo, explicou que “a inspiración da grafica do cartaz foron as pequenas ilustracións de Castelao para cabeceiras da revista Nós. Castelao coma deseñador gráfico tirou moito destas formas enmarcadas, moi saturadas de gráfica, e moitas veces con elementos que inspiran movemento ou directamente secuencias. Pertence á súa primeira época, e, malia que a min sempre me gustaron moito, dentro da obra de Castelao son “obras menores” (coma as curtas), por iso pensei en que encaixaban en Cans”.
Deste xeito, ademáis da estrea de Antes de nós e a chiscadela do cartel, o Festival de Cans quere sumarse á celebración do ano Castelao polos 75 anos do falecemento de Castelao, o Festival de Cans programará varias accións transversais sobre a figura do escritor, ilustrador e político galego que se coñecerán nos próximos días.
Oferta promocional nos 200 primeiros packs do festival ata o 27 de abril
Keka Losada anuncio que “desde hoxe xa están a venda 200 packs en oferta de lanzamento por só 22 euros ata o 27 de abril” e agradeceu aos cineastas e xornalistas a súa presenza. “O festival faise máis grande se os profesionais do audiovisual galego medran”, apuntou.
Cada pack leva unha entrada para a sección de ficción e animación (14 euros), unha camisola da XXII edición (14 euros), unha chapa de edición limitada (1 euro) e un catálogo impreso en papel (3 euros). Os que aproveiten esta oferta terán un desconto de 10 euros sobre o prezo final do pack sen promoción. As persoas que merquen este primeiro pack serán as que teñan xa as primeiras camisolas e entradas, que poderán recoller fisicamente nas tendas de Rei Zentolo en A Coruña, Lugo, Ourense e Pontevedra, ademáis de Vigo e Santiago e, na tenda de Tía Tata de Porriño. Os packs poden adquirirse na tenda online do festival tenda online do festival.
