Minicans

Excepcional acordeonista e violinista, Carlos Quintá proponnos un espectáculo familiar participativo e imaxinativo a partir dos relatos marabillosos que saen da maleta de Caxide, o seu avó. Música, marionetas, instrumentos lúdicos como o reco-reco e fascinantes historias ilustradas que parten do mundo rural, baseadas na literatura de cordel dos antigos cantares de cego e poden considerarse a prehistoria dos storyboards utilizados na preprodución das películas.

Unha selección de curtas de animación para os nenos e nenas, no interior desta máxica caravana vintage convertida nunha pequena sala de cinema.

Ricardo García, artesán cunha longa tradición familiar na olería, impartirá un obradoiro infantil para xogar con ideas en torno ao cinema e ao festival.

Con motivo do 150 aniversario do nacemento do arquitecto porriñés Antonio Palacios (1874-1945) o Festival de Cans e os contadores e debuxantes de Polo Correo do Vento, únense para promover este espectáculo didáctico, baseado na arquitectura e no cinema. Un xeito divertido e participativo de explicar o oficio do arquitecto, debuxante e inventor de casas, e como os montes de granito de Cans e O Porriño influiron en Palacios, o autor dos edificios máis emblemáticos de Madrid.

Este espectáculo mestura a narración co teatro e o cinema para tratar de espertar nos nenos e nenas o amor polo cine a través da historia da pioneira Alice Guy, a primeira cineasta en dirixir un filme de ficción, ademáis de actriz, guionista, deseñadora de vestiario, cámara, produtora, cómica, maga e moito máis. A actividade visibiliza dun xeito didáctico o traballo desta artista inxustamente esquecida.